Trajneri i Shkëndijës, Jeton Beqiri (43), ka dhënë vlerësimet pas fitores surprizë 1-0 ndaj kampionëve të Rumanisë në ndeshjen e parë të raundit të dytë kualifikues në Ligën e Kampionëve.
Beqiri ka pranuar se skuadra e tij nuk ishte favorite, ndërsa vlerësoi maksimalisht kundërshtarin. Ai theksoi se pavarësisht rezultatit të parë, rumunët mbeten me më shumë gjasa për kualifikim.
„Është një rezultat i mirë për ne, sepse luajtëm kundër një skuadre shumë të madhe. Steaua Bukuresht është një klub i madh dhe ishte favorit në këtë përballje. Ne e shijuam këtë ndeshje dhe patëm një paraqitje të mirë nga pikëpamja taktike“, ka deklaruar pas ndeshjes Beqiri, përcjellë Kërlaçki.
„Në disa momente patëm fat, por edhe Steaua ishte me fat në rastet tona. Unë vazhdoj të them që ata janë favoritë – kanë lojtarë cilësorë dhe një trajner shumë të mirë, që ka kohë është në këtë ekip“.
„E respektuam Steauan maksimalisht dhe do të vazhdojmë ta bëjmë edhe këtë javë. Do të japim më të mirën tonë“
Ndeshja e kthimit FCSB – Shkëndija luhet të mërkurën, më 30 korrik, në orën 20:30.
Fituesi i kësaj përballjeje luan me fituesin mes Qarabag dhe Shelbourne. Kush kalon mëtej, i mbetet vetëm një raund (play-off-i) për të hyrë në fazën e grupeve të Ligës së Kampionëve.
Në rast eliminimi, Shkëndija apo FCSB do të vijojë garën në Ligën e Europës, duke u përballur me humbësin e çiftit FC Copenhagen – Drita.
