Transferimi i Ardon Jasharit shihet si një goditje e madhe e Milanit, madje edhe nga rivalët historikë të kuqezinjve.
Drejtori sportiv i Interit, Piero Ausilio, në një intervistë për Gazzetta dello Sport, ka pranuar se Igli Tare ka bërë një lëvizje të shkëlqyer me afrimin e mesfushorit shqiptar.
Duke folur për disa nga momentet më të rëndësishme të karrierës së tij, Ausilio ndau edhe një prapaskenë familjare që lidhet pikërisht me Jasharin.
“Fëmijët e mi? Julia ka marrë një rrugë krejt tjetër. Nicolo nuk ishte i mirë me këmbët, la futbollin, por ka shumë pasion; sheh një mijë ndeshje dhe studion lojtarët. Kur Jashari shkoi te Milani, më kritikoi. Më tha: ‘Ta kam këshilluar kur ishte te Luzern, e le të të ikte nga duart’. Është e vërtetë, por nuk është se mund t’i marrim ne të gjithë më të mirët”.
Ky rrëfim i Ausilios tregon jo vetëm vlerësimin e tij personal për mesfushorin e ri, por edhe faktin se transferimi i Jasharit ka bërë jehonë edhe në kampin e rivalëve.
