Lille ka marrë një vendim të prerë për Edon Zhegrovën. Pavarësisht dëshirës së tij për largim gjatë verës, që e kishte detyruar të stërvitej me ekipin rezervë, Zhegrova do të rikthehet në grupin profesional të Lille-it që nga e hëna.
Ai erdhi në janar 2022 nga FC Basel për 7 milionë euro dhe është një ndërkombëtar kosovar me 34 paraqitje dhe 4 gola, i cili gjatë fazës së pushimit kishte shprehur dëshirën për t’u larguar, gjë që çoi në përjashtimin e tij nga skuadra e parë.
Për Zhegrovën u përfol gjatë për një transferim të mundshëm te Olympique de Marseille, por asnjë ofertë konkrete nuk u realizua deri tani. Në konferencën e fundit për shtyp, Olivier Létang, presidenti i LOSC-së, tha se në këtë moment nuk janë krijuar kushtet për largimin e tij.
“Ne kemi menduar për largimin e tij në një moment, por sot kushtet nuk janë të përshtatshme për këtë. Në vend që të kërkojmë dikë tjetër nga jashtë, ne kemi një lojtar që është këtu, në shtëpi, dhe që është në formë. Marrëveshja me të është që ai të luajë sezonin me ne,” tha ai.
Ky vendim i jep Zhegrovës mundësinë të rikthehet në ekipin e parë dhe të japë kontributin e tij në objektivat e klubit gjatë këtij sezoni.
