Ceremonia përmbyllëse e Kampionatit Evropian të Esports në CS2 solli emocion, krenari dhe festë, duke kurorëzuar më të mirët e këtij turneu historik që u mbajt në Prishtinë.
Përfaqësuesja që eliminoi Kosovën në cerekfinale, Lituania, u shpall kampione e madhe e EEC25, duke fituar medaljen e artë pas një finale të fuqishme kundër Ukrainës dhe duke ngritur trofeun simbolik “Helmeta Ilire”.
Kjo fitore i vendos ata në faqet e historisë së këtij sporti si një nga skuadrat më të forta dhe të përkushtuara.
Ukraina rrëmbeu medaljen e argjendtë, duke treguar një performancë të jashtëzakonshme deri në finale, me forcë, pasion dhe vendosmëri deri në momentin e fundit.
Gjermania, nga ana tjetër, mori vendin e tretë, duke fituar ndeshjen për medaljen e bronztë ndaj Danimarkës me një paraqitje të qëndrueshme dhe të fortë gjatë gjithë turneut.
Ky edicion i Kampionatit Evropian të Esports 2025, i zhvilluar në Prishtinë, ishte një sukses i madh, falë përkushtimit të lojtarëve, ekipeve, stafit organizues, tifozëve dhe partnerëve.
Shpirti i Esports në Evropë ishte më i gjallë se kurrë në zemër të Kosovës.
