Portugalia realizoi një surprizë të madhe në fillimin e fazës përgatitore për EuroBasket 2025, duke mposhtur kampionët në fuqi të Evropës, Spanjën.
Portugalia, e renditur e 56-ta në botë, përmbysi mbrëmë disavantazhin prej 17 pikësh dhe mposhti Spanjën me rezultatin 76-74 në Malagë, në ndeshjen hapëse të të dyja përfaqësueseve para fillimit të EuroBasket më 27 gusht.
Spanja kryesonte 34-17 në fillim të çerekut të dytë, por Portugalia e ngushtoi epërsinë dhe e barazoi sfidën drejt fundit të çerekut të tretë. Epërsia kaloi në duart e Portugalisë në minutat e fundit të takimit, me një dank të Neemias Queta për rezultatin 72-70.
Francisco Amarante realizoi dy gjuajtje të lira vendimtare 15 sekonda para fundit, ndërsa Queta vulosi fitoren me një tjetër dank 3.8 sekonda nga fundi.
Queta konfirmoi formën e tij të mirë për rikthimin e Portugalisë në EuroBasket pas më shumë se një dekade (që nga viti 2011), duke shënuar 15 pikë, 9 kërcime (5 ofensive) dhe 3 asistime. Travante Williams shtoi 14 pikë dhe 5 asistime, ndërsa Vladyslav Voytso realizoi 3 treshe për gjithsej 10 pikë.
Asnjë lojtar i Spanjës nuk arriti shifra dyshifrore, me Xabi Lopez-Arostegui si më efikasi me 9 pikë.
Portugalia do të qëndrojë në Malaga dhe do të përballet me përfaqësuesen B të Spanjës të enjten, më 7 gusht. Ndërkohë, ekipi A i Spanjës i drejtuar nga Sergio Scariolo do të ndeshet me Çekinë po atë ditë.
Rezultate të tjera të miqësoreve para EuroBasket 2025:
Estonia 93-81 Izrael
Estonia regjistroi fitoren e parë në përgatitje, duke mundur Izraelin 93-81 në një takim të zhvilluar në Letoni. Një çerek i tretë mbresëlënës me rezultat 27-15 ishte çelësi i suksesit. Kaspar Treier dhe Artur Konontsuk shënuan nga 16 pikë secili për Estoninë. Në krahun tjetër, Roman Sorkin realizoi 22 pikë për Izraelin, ndërsa Deni Avdija shtoi 17.
Spanja B 80-75 Çekia
Çekia pati një nisje të pafat në fazën përgatitore, duke u mundur 80-75 në Malaga nga skuadra B e Spanjës. Martin Peterka ishte më i miri për çekët me 15 pikë, ndërsa Richard Balint shtoi 10. Tomas Satoransky u aktivizua vetëm për 9 minuta, duke kontribuar me 2 pikë dhe 3 asistime.
Serbia 126-89 Bosnjë dhe Hercegovinë
Serbia ka mposhtur keq Bosnjën me 126-89 në një ndeshje pa tifozë dhe pa praninë e mediave.
